රෝස කැළේ

මේ ගෙවෙන්නෙ සමර් හෙවත් ග්‍රීෂ්ම සෘතුව . පුදුම රස්නයක් දැනෙන්නෙ. එලියට අඩිය තියද්දිම හරිම මහන්සියක් දැනෙනව ඇඟට. සමකාසන්න, ඝර්මකලාපීය රටකින් ආව අපිට ඉර අවූව,රස්නය අමුතු දේවල් නෙමේ. ඒත් මෙහෙදි දැනෙන රස්නය හරිම වෙනස්. ලංකාවෙදි අපි කොච්චර කට්ට අවුවෙ ඇවිදිනවද . ඒත් මෙහේ රස්නයත් එක්ක එන්නෙ ඔළුව කැරකෙන ගතියක්. ඒකට ප්‍රධානම හේතුව මෙහේ හිය්මිඩිටි එහෙමත් නැත්නම් වාතයේ ජල වාෂ්ප ප්‍රමාණය හරිම අඩු එක. ඒ නිසා හරිම වියලි ගතියක් තමා පරිසරයෙ තියෙන්නෙ. ලස්සන කොල පාටට ගස් කොලන් දිලිසුනාට මේ අවුවෙ ඒ ලස්සන විදින්න එලියට බහින්න විදියක් නෑ. සමහර වෙලාවට හීට් වෝර්නින්ග් දෙනව. රස්නෙ උනාට දාඩිය දාන්නෙ නැම. ඒ නිසා තවත් ඇඟට අමාරුයි ,මොකද ඇඟ සිසිල් වෙන්න්නටනම් ක්‍රමයක් නෑනෙ. හුලං හමනකොටනම් ඔන්න තරමක් සනීපයි. ඔන්න ඔහොමයි රස්නෙ කාලෙට මෙහෙ. ඉතින් මේ කාලෙ ජනප්‍රියම කෑම තමයි "අයිස් ක්‍රීම්" කවුද අයිස් ක්‍රීම් කන්න අකමැති, බාල මහළු හැමෝම ආස කෑමක්නෙ . අපේ මාමනම් හැබැයි ඔය හිම කිරම කටේ තියන්නෙ නෑ. එයා පුංචිකාලෙ පාසලෙන් අධ්‍යාපන චාරිකාවක් එක්ක ගිහින් තියනව ඔය හිම කිරම හදන තැනකට. ඒක බලල  ආපු දවසෙ ඉදන් තමාලු එයා අයිස්  කරීම් නොකන්නෙ.(කොහොමට තියෙන්න ඇද්ද තැන පොඩි දරුවෙක්ට අයිස්ක්‍රීම් එපා වෙන්න තරම්.) ම් ප්ල්ලාත් ඔය පෙට්ටි වල එන අයිස් ක්‍රීම් වලට ඒ හැටි මනාප නෑ මම ආස කෝන් එකේ දාපු අයිස් ක්‍රීම් වලට.    මෙන්න මේ වගේ.

  අපේ ගමෙ පල්ලියෙ මංගල්ලෙට එනව අයිස් ක්‍රීම් වෑන්. ඒවගෙන් අයිස් ක්‍රීම් කන්න අපි පුංචි කාලෙ හරිම ආසයි.(දැනුත් ඉතින් එහෙන තමා,ඒ උනාට ඒ ආසාව පල්ලියෙ ආගමික වැඩ ඉවර වෙනකන් හංගගන ඉන්න වෙනව දැන්) පල්ලිය වත්තට ඇතුල් වෙද්දිම අයිස් ක්‍රීම් අරන් දෙන්නකෝ කිය කිය අම්මලාට කරදර කරන එක අපේ පුරුද්දක්.අම්මලත් ,ඔයාල හොඳ ලමයි වගේ හිටියොත් යද්දි අරන්දෙනව කියල කියනව. ඉතින් පූජාවෙන් පස්සෙ හම්බවෙන අයිස් ක්‍රීම් එකත් දිව ගාමින් තමා අපි අනෙක් කඩවල ඇවිදින්නෙ. ඒ අයිස් ක්‍රීම් වල රස අපිට දිව්‍යලෝක රසයි.  වයසින් වැඩුනට පස්සෙනම් මට තේරුනේ ඒ රස දැනෙන්නෙ අයිස් ක්‍රීම් එක ඒ තරම් රස නිසා නෙවෙයි. ඒ රස එන්නෙ අපේ හිතින් ඒත් එක්ක විදින මානසික ස්තුටින් කියල. අදටත් මම කඩේ තියන අයිස් ක්‍රීම් කෝන් ගෙනත් ඒවට අයිස් ක්‍රීම් පුරවගන කන්න තමා කැමති.  අයිස් ක්‍රීම් වලට දීර්ඝ ඉතිහාසයක් තියනව.  පර්සියානු අධිරාජ්‍යයේ මිනිස්සුන් ඉතා අතීතයේ හිම කැටි දැමූ භාජනවලට මිදි යුෂ වත් කර  විශේෂ අවස්ථාවලදී ආහාරයට ගෙන තිබෙනවා. බු.ව. 200 පමන කාලයේදී චීනයේ මිනිසුන් කිරි සහ බත් එක්කර සිසිල් මිදීමට ලක් කර ආහාරයටෙ ගෙන තිබෙනවා. අරාබින්, මොන්ගෝලියන් වරු,ඉතාලිය ප්‍රංශය ඇතුලු රටවල් බොහොමයක් ඉතා අතීතයේ අයිස් ක්‍රීම් වල මුත්න් මිත්තන් කියල හිතන්න පුලුවන් ආහාර භාවිත කරල තියනවා.

අයිස් ක්‍රීම් වල ප්‍රධාන වශයෙන් අඩoගුවෙන්නෙ කිරි සහ සීනි.ඊට අමතරව එක් එක් රස වල රසකාරක ආදිය භාවිතාවෙනව. මගේ ලොකු අම්මා ගෙදරදීම අයිස් ක්‍රීම් හදන්න පුරුදුවෙලා හිටිය. මටනම් ඔය සාස්තරේ ඉගනගන්න බැරි උනා. දැන් උනත් අහගන හදන්න හිතෙන්නෙ නැත්තෙ ඉතා ලාබෙට පහසුවෙන් අයිස් ක්‍රීම් මිලදී ගන්න තියෙන නිසයි. කාලෙකට ඉහත හරිම සද්දෙට සංගීත හඬකුත් එක්ක වෝල්ස් වෙලෙන්දො හැම තැනම ගියා. අපේ  සුදු පුංචි ඒ වෝල්ස් අයිස් ක්‍රීම් රුසියෙක්. ඒ බව දන්න අපි ඒ සද්දෙ ඇහෙනකොටම එයාගාවට දුවගන ගිහින් අයිස් ක්‍රීම් මිලදීගන්න උනන්දු කරනව.  අදත් රස්නෙ වැඩි දවසක්. වායුසමීකරනය  නිසා ගොඩ නැඟිලි ඇතුලෙ ඉන්න පුළුවන් උනත් එලියට යන්නනම් බෑ. ජනේලයෙන් අවුවෙ සැර පේනව හොන්දට . ම්ම්ම්ම්ම් අයිස් ක්‍රීම් එකකට හොඳ වෙලාව...

මීට හරියටම අවුරුද්දකට කලියෙන් තමා මම මේ පුංචි රෝස කැළේ වවන්න ගත්තෙ. අද එයාගෙ අවුරුද්දෙ උපන්දිනේ. මගේ පුංචි බ්ලොග් එක බ්ලොග් පෝස්ට් මහා ගොඩකින් සරසන්න මට පහුගිය අවුරුද්දෙ බැරි උනත් අවුරුද්දක් තිස්සෙ මගෙ බෝරින්ග් කතා අහගන හිටපු  හැමෝටම ගොඩාක් ස්තූතියි.  ඉතින් මේ රෝසමල් අවුරුද්දක් මා එක්ක ‍රැඳුනු, මාව දිරි ගන්වපු ඒ වගේම රෝස කැළේට මම මාස ගනන් නෑවිදින් ඉන්න කොට ඒක බලා ගත්තු ඔයාල හැමෝටම .....